ला लिगा फुटबलको शीर्ष स्थानमा रहेको बार्सिलोना रियल सोसिडाडसँग स्तब्ध भएको छ। गएराति आफ्नै घरेलु मैदानमा भएको खेलमा रियल सोसिडाडले शीर्ष स्थानमा रहेको बार्सिलोनालाई १–० गोल अन्तरले पराजित गरेको हो। खेलको ५ औँ मिनेटमा रियल सोसिडाडका लागि मिकेलले गरेको गोल नै निर्णायक बन्यो।
तर बार्सिलोनाले राम्रा केही मौका भने गुमाएको थियो। बार्सिलोनाका स्टार खेलाडी लियोनल मेसी र नेमारले राम्रा मौका पाएपनि गोल गर्न सकेनन् भने मुनिर र इनिष्टाले पनि राम्रा अबसर खेर फालेका थिए।
बार्सिलोना ला लिगा पछिल्ला दुई खेलमा लगातार पराजित हुन पुगेको छ। गएराति रियल सोसिडाडसँग पराजित भएको बार्सिलोना यसअघि भएको ला लिगाकै अघिल्लो खेलमा आफ्नै घरेलु मैदान क्याम्प नाउमा चिरप्रतिद्वन्द्वी रियल मड्रिडसँग पराजित भएको थियो।
बार्सिलोना ३२ खेलबाट ७६ अंकका साथ शीर्ष स्थानमा यथावत छ भने दोस्रो स्थानमा रहेको एथ्लेटिको मड्रिडको समान खेलाबाट ७३ र रियल मड्रिडको ७२ अंक छ।
No comments:
Post a Comment